Ungmennafélagið Æskan á Svalbarðsströnd er rótgróið og virkt grasrótarfélag sem vinnur að því að efla heilbrigt, uppbyggilegt og aðgengilegt æskulýðsstarf í nærumhverfinu.

Félagið stendur fyrir fjölbreyttu íþrótta- og tómstundastarfi fyrir börn, ungmenni og fullorðna. Dagskráin samanstendur m.a. af hlaupahóp, blaki, bandí, pílukvöldum og ýmiss konar félagslegum viðburðum eins og spilakvöldum, kvissi og opnum samverustundum. Allt starf félagsins byggir á sjálfboðaliðum og er þátttaka gjaldfrjáls, þar sem jöfnuður og aðgengi eru höfð að leiðarljósi.

Í daglegu starfi Æskunnar er lögð áhersla á að skapa vettvang fyrir hreyfingu, gleði, virkni og tengsl – og það með þeim krafti sem aðeins sameiginlegt frumkvæði og samfélagsvilji getur byggt upp.

Árið 2024 fékk Æskan til afnota gamla áhaldahúsið á Svalbarðseyri. Ráðist var í miklar endurbætur á húsinu með aðstoð sjálfboðaliða, sveitarfélagsins og styrktaraðila. Húsið hlaut nafnið Æskuheimilið og gegnir nú lykilhlutverki í félagsstarfi. Þar er glæsileg píluaðstaða með fjórum spjöldum, rými fyrir viðburði og æfingar – og ekki síst, eldri borgara kaffið sem haldið er reglulega í húsinu og styrkir kynslóðatengsl og samfélagsanda. 

Stefna Æskunnar er að vera vettvangur fyrir þátttöku, frumkvæði og samfélagslega samveru – þar sem allir geta lagt sitt af mörkum og fundið sér farveg, hvort sem er í íþróttum, viðburðum, verkefnum eða samveru.